Duh li Amedê sêyem danişîna doza darizandina Hevşaredarê Şaredariya Bajarê Mezin ê Amedê Adnan Selçûk Mizrakliyî li Dadgeha Cezayê Giran a 9an Amedê pêk hat.
Danişîn çar saetan dewam kir û bi rêya Sîstema Deng û Dîmenan (SEGBIS) Umît Akbiyikê şahid, îfade da.
Dadgeha herêmî beriya niha 9 sal û 4 meh û 15 roj cezayê girtîgehê li Mizrakliyî birîbû. Beşa 3yem a Cezayan a Dadgeha Bilind ev biryar nepejirandibû û dosye bi şûn de şandibû ji bo dadgeha herêmî.
Di danişîna duh de piştî Akbiyikî îfade da, parêzerên Mizrakliyî Mehmet Emîn Aktar, Zulal Erdogan û Muhsîn Bîlalî paraznameyên xwe pêşkêş kirin.
Piştî wan jî dozgerî nêrîna xwe ragihand. Dozgerî Mizrakli bi “endamtiya rêxistinê” tohmetbar kir û xwest ew ceza bibe.
Heyeta dadgehê jî biryara xwe aşkere kir ku Mizrakli bi tohmeta “endamtiya rêxistinê” ceza kir. Li gorî biryarê, 7 sal û 6 meh cezayê girtîgehê li Mizrakliyî birî û bi qasî nîvê wê zêde kir ku di encamê de 10 sal û 6 meh ceza li Mizrakliyî hate birîn. Paşê jî heyetê ji vî cezayê kêmek daxist û biryar da ku Mizrakli bi 9 sal û 4 meh û 15 roj cezayê girtîgehê bê cezakirin. (RT/FD)
