Dadgehê îdianameya rojnameger Muftuoglû û Yilmazî nepejirandiye
Ji bo nûçeya tirkî bitikîne
Dadgeha 28an a Cezayê Giran a Enqereyê, îdianameya derbarê Hevseroka Giştî ya Komeleya Rojnamegeran a Dîcle Firatê (DFG) û edîtora Ajansa Mezopotamyayê (MA) Dîcle Muftuoglûyê û edîtorê heman Ajansê û edîtor/nivîskarê pirtûkxaneya zarokan a biayê Sedat Yilmazî de hatiye amadekirin, bi şûn de şandiye.
Serdozgeriya Komarî ya Enqereyê 5 jê girtî ji bo 49 kesan îdianame amade kiriye.
Li gorî nûçeya MAyê, ji ber ku biryara nepenîtiyê li ser dosyeyê heye, sedema nepejirandinê nehatiye zanîn.
Çi bûbû?
Serdozgeriya Komarî ya Enqereyê lêpirsînek dabû destpêkirin û di encamê de li 15 bajaran polîsan bi ser malan de girtibûn. 19 kes hatibûn desteserkirin ku Sedat Yilmaz û Dîcle Muftuoglû jî di nava wan de bûn. Di 2yê Gulanê de kesên desteserkirî biribûn edliyeyê û dozgeriyê daxwaza girtina 15 kesan kiribû û xwestibû 3 jî bi şertê kontrola edlî serbest bibin.
Dadweriya Aştî û Cezayî ya Nobedar a Enqereyê biryara girtina rojnameger Sedat Yilmaz, Dîcle Muftuoglû û Erol Balci, Abdûrrahîm Tanyelî û Ramazan Debeyî dabû.
Hevjîna Sedat Yilmazî Selma Yilmaz, Cahît Kanbay, Cîhan Guneş, Îsmaîl Adanmış, Cahît Ablay, Mahmût Dogû, Devran Ak, Şemsettîn Toprak, Mehmet Emîn Yildirim, Cevdet Îsmaîlogûllari, Hasan Ozhan, Evîn Ozbek û Sûat Karagoz bi şertê kontrola edlî serbest bûbûn. Li gorî biryara dadweriyê wê ev kes biçin îmzeyê bidin û nikaribin derkevin ji derveyî Tirkiyeyê.
Bixwîne - Rojnameger Muftuoglû û Yilmaz hatine girtin
(AS/FD)
