Dadgeha Destûrî: Mafê rojnameger Ûgûrî hatiye binpêkirin

Ji bo nûçeya tirkî / ingilîzî bitikîne

Dadgeha Destûra Bingehîn biryara xwe ya debarê rojnameger Cemîl Ûgûrî de aşkere kiriye.

Piştî ku li Şaxê, navçeya Wanê leşkeran Osman Şîban û Servet Tûrgût ji helîkopterê avêtin û nûçeya wan li Ajansa Mezopotamya û JinNewsê hatin weşandin, tevlî Ûgûrî 5 rojnameger hatibûn girtin û 6 mehan girtî mabûn.

Komeleya Xebatên Medya û Hiqûqê (MLSA) parêzvaniya Ûgûrî dike û wan li ser navê rojnamegerî serî li Dadgehê dabûn. Dadgehê di biryara xwe de aşkere kiriye ku girtina Ûgûrî ne li dijî Destûra Bingehîn e.

Bixwîne - Rojnamegerên ku nûçeyên îşkencekirinê çêkirine, azad bûne

Bixwîne - Rojnamegerên li Wanê girtî ne wê 2yê Nîsanê werin dadgehkirin

Dadgehê her weha diyar kiriye ku ji ber 6 mehan ew girtî maye, “maf û ewlehiya wî ya şexsî hatiye binpêkirin.”

Dadgeha Destûra Bingehîn daxwaza Ûgûrî ya ku gotibû “mafê azadiya xweîfadekirin û çapemeniyê hatiye binpêkirin” qebûl nekiriye.

Dadgehê diyar kiriye ku ew îdiaya dibêje rojnamegeran “Li gorî xala 14an a Peymana KCKyê xebat kirine” bêbingeh e û delîl ji îdiayan re nehatine peydakirin. Her weha gotiye ku nabe Ûgûr ji ber naveroka nûçeyên xwe, bi endamtiya rêxistinê were tawanbarkirin.

Dadgehê gotiye, “Di biryara girtinê de hatiye diyarkirin ku li ajansa serlêder lê kar dike weşanên rêxistinî tê kirin lê qet behsa nûçeyeke têkildarî serlêderî nehatiye kirin.” Dadgehê di dewama vê biryarê de destnîşan kiriye ku nabe bi tena serê xwe ajansa lê kar dike weke delîl nîşan bidin û bikin sedema girtina wî.

Dadgehê hewce nedîtiye ku nûçeya Ûgûrî ya derbarê Osman Şîban û Servet Tûrgûtî de binirxîne.

Li gorî vê encamê, dadgehê qebûl kiriye ku 67 hezar û 500 TLyî bidin Ûgûrî. Daxwazên din ên derbarê tezmînatê de qebûl nekiriye. (HA/FD)