Li bajarên Dihok û Hewlêrê yên Herêma Kurdistanê îro bi dronên bombebarkirî du êrişên cûda pêk hatin.
Li gorî nûçeya Rûdawê Dijîterora Herêma Kurdistanê ragihand ku di her du êrişan de ti zererên canî û madî çênebûne.
Li gorî daxuyaniya Dijîterora Herêma Kurdistanê îro di saet 10:50an de droneke bombebarkirî li nêzîkî gundê Sûrîjeyê yê nahiya Şemamkê ya parêzgeha Hewlêrê ketiye xwarê.
Dijîterora Kurdistanê derbarê encamên êrişan da zanîn ku ti zererên canî û madî çênebûne.
Dijîterorê her wiha diyar kir ku saet 10:55an jî bi rêya droneke din a bombebarkirî, careke din êrişî parzûngeha petrolê ya DNOyê ya li Tawkê ya li Zaxoyê hatiye kirin.
Wezareta Çavkaniyên Xwezayî ya Herêma Kurdistanê ev êriş bi tundî şermezar kirin.
Hikûmeta Herêma Kurdistanê bangî civaka navneteweyî kir
Wezaretê her wiha bangî hikûmeta federal a Îraqê û civaka navneteweyî kir ku canê welatiyên nêzîkî van deveran û karmendên sivîl biparêzin û rê li ber êrişên li Herêma Kurdistanê û sektora wê ya enerjiyê bigirin.
Ev ne cara yekem e ku parzûngehên petrolê yên Herêma Kurdistanê dibin armanc.
Roja çarşemê jî saet 07:00 sibehê, bi droneke bombebarkirî êrişî heman parzûngeha petrolê ya DNOyê li Tawê hatibû kirin.
Li gorî daxuyaniya Dijîterora Kurdistanê, ji bilî zererên madî yên ku gihîştibûn parzûngehê ti zererên canî çênebûbûn.
18 êrişên bi dronan çêbûne
Li gorî şopandina Rûdawê, tenê vê mehê 18 êrişên bi dronan li Başûrê Kurdistanê hatine kirin ku 7 ji wan li qadên petrolê bûne.
Van êrişên bi dronan zerereke mezin gihandiye binesaziya enerjiyê ya Herêma Kurdistanê.
Alîkarê Birêvebirê Nivîsîngeha Serokê Hikûmeta Herêma Kurdistanê Ezîz Ehmed roja çarşemê ragihand ku Herêma Kurdistanê di encama van êrişan de 200 hezar bermîlên petrolê ji dest dane.
Komeleya Pîşesaziya Petrolê ya Kurdistanê (APIKUR) jî çarşemê di daxuyaniyekê de ragihand ku ji ber êrişên dronan, piraniya endamên wan neçar mane ku hilberîna petrolê li parzûngehên petrolê yên Herêma Kurdistanê rawestînin.
(AY)
