Di 18ê Adarê de Rektoriya Zanîngeha Stenbolê  dîplomaya Şaredarê Bajarê Mezin ê Stenbolê Ekrem Îmamoglû betal kir û piştre desteser kirin. Di 23ê Adarê de Îmamoglû hat girtin û xwepêşandanên xwendekaran dest pê kirin. Her weha xwepêşandan hê jî didomin. 

Zanîngeha Teknîkî ya Rojhilata Navîn (ODTU) ya ku li Enqereyê bû navenda xwepêşandanên xwendekaran, şeva borî (26ê Adarê) di bin dorpêça polîsan de bû.

Ji ber ku polîsan encamên danûsitandina ku roj berê bi xwendekaran re kiribûn bi cih neanîn, xwendekar hatin cem hev û bi daxwaza "rakirina dorpêça polîsan" ber bi deriyê A1ê ve meşiyan. Li gel xwendekaran, Parlamenterên Partiya Gel a Komarî (CHP) Melih Meriç û Mehmet Guzelmansur jî bi polîsan re danûstandin kirin. Parlamenteran xwest ku TOMA ji derdora zanîngehê  bên derxistin û destewêrdanê li xwendekaran nekin.

Dema parlamenterên CHPê daxwazên xwendekaran gihandin polîsan, rêvebirê polîsan diyar kir ku bi biryara hevpar a Walîtiya Enqereyê û Rektoriya ODTUyê TOMA li dibistanê ne.

Tevî parlamenteran jî polîsan bi gazê û ava şid mudaxeleyî çalakiya aştiyane ya xwendekaran kir.

Xwendekaran bi dirûşmên, "Dema jin dihat kuştin polîs li ku bûn?", "Dema ku daristan dişewitin polîs li ku bûn?" bertek nîşanî mudaxeleya polîsan dan. Di encama mudaxeleyê de 30 xwendekar hatin desteserkirin.

“Polîsan hêzeke bêpîvan bikaranî”

Di daxuyaniya çapemeniyê ya piştî desteserkirinan de xwendekaran wiha got: 

“Em hemû kesên ku li Tirkiyeyê li dijî neheqiyan mafên xwe yê xwepêşandana aştiyane bikartînin ji ODTUyê wan silav dikin. Îro berxwedana me ya li ODTUyê di roja heftemîn de ye. Piştî ku polîsan rojek berê soza belavbûna dorpêçê da û piştre bicih neanî, em bi hevrêyên xwe û du parlamenterên xwe re bi awayekî aştiyane ber bi deriyê A1ê ve meşiyan.”

"Di vê navberê de polîsan bi TOMAyan,  gaza îsotê û guleyên plastîk li hemberî me hêzeke bê pîvan bi kar anî. Bi dehan hevalên me hatin desteserkirin. Weke xwendekarên ODTUyê em ji raya giştî re radigihînin ku em ê dest ji têkoşîna xwe ya mafdar bernedin û em ê şopdarê hevalên xwe yên hatine desteserkirin bin."

Îfadeya xwendekarên ku hatine desteserkirin wê di nava rojê de bên girtin.

Her weha di dema mudaxeleya polîsan de xwendekarek bi darê zorê li erdê razandin û tûndkarî lê kirin.

Parlamenterê CHP'ê yê Dîlokê Melîh Merîç bertek nîşanî tûndkariya polîsan da û got, "Bi fermanên neqanûnî zext û îşkenceyê li ciwanên ku mafên xwe yên destûrî bi kar tînin, nekin. Îşkence sûcê mirovahiyê ye! Miemeleya li ciwanên birûmet ên vî welatî tê kirin, wijdanan birîn dike. Ev ciwanana heyfin, guneh in. ODTU azad e dê azad bimîne.”

Xwendekaran diyar kirin ku ew ê biryara xwe ya boykotkirina akademîk bidomînin û banga "greva giştî, berxwedana giştî" kirin û dawî li çalakiya xwe anîn. (DS/TY/AY)

Kanunsuz emirlerle, anayasal haklarını kullanan gençlere baskı ve işkence uygulamaktan vazgeçin!

İşkence insanlık suçudur!

Bu ülkenin pırıl pırıl gençlerine reva görülen muamele vicdanları yaralıyor.

Bu gençlere yazıktır, günahtır!
ODTÜ özgürdür, özgür kalacaktır! #CHP… pic.twitter.com/5qYinZyA7B

— Melih Meriç (@melih_meric) March 26, 2025