Fotograf: AA
Bernameyên bîranînên 32em salvegera Komkujiya Helebceyê ji ber belavbûna vîrusa Covîd-19ê hatine betalkirin.
Piştî ku bernameyên bîranînên 32em salvegera kîmyabarankirina Helebceyê ji ber vîrûsa Covîd-19ê hatîye betalkirin, hin malbatan serdana gorên xizmên xwe kirine û ji bo wan dua xwendine.
Herweha ji bo yadkirina komkujîya Helebceyê Partiya Demokratîk a Gelan (HDP) daxuyanîyek belav kirîye û tê de gotîye: "Mirovahî dê vê yekê weke 'qirkirinê' bi bîr bîne. Em ê komkujiya Helebçeyê ji bîr nekin ku 5 hezar Kurd hatin qetilkirin. Em ê qêrîna zarokên Kurd ku digotin 'Dayê bêhna sêvan tê' ji bîr nekin. Em ê yên ku çekên kîmyewî dane rejîma Saddam ku li ser Kurdan biceribîne ji bîr nekin. Em ê yên ku komkujiya Helebçeyê paşçav kirîye jî ji bîr nekin."
Serok û Serokwezîrê Herêma Kurdistanê peyam belav kirine
Mesrûr Barzanî, Serokwezîrê Herêma Kurdistanê jî ji bo 32em salvegera kîmyabarankirina Helebceyê peyamek belav kirîye û gotîye; "Komkujiya Helebceyê tawaneke mezin bû ku li hember netewa me hat kirin" û diyar kiriye ev tawan "beşek ji siyaseta qirkirina gelê Kurdistanê ye."
Herweha Nêçîrvan Barzanî, Serokê Herêma Kurdistanê jî bi boneya 32mîn salvegera kîmyabarana Helebceyê peyamek belav kirîye û tê de ragihandîye; “Îro 32 sal di ser karesata kîmyabarankirina Helebceya Şehîd ra derbas dibe ku ji aliyê rejîma berê ya Iraqê ve hatibû encamdan û bû sedema şehîdbûna 5 hezar hemwelatiyên bêtawan û birîndarbûna hezarên din û koçberbûna hezaran malbatan. Heta niha jî bandora wê pêketina metirsîdar li ser rewşa tendirustî û derûniya xelk û jîngeha navçeyê her berdewame.”
Derbarê Komkujiya Helebceyê de
Komkujîya Helebceyê di 16ê Adara 1988an da bi fermana Sedam Huseyîn, Serokdewleta Iraqê yê îdamkirî vi hatîye kirin. Di encama êrişa kîmyabaranê da 5 hezar kes hatibûn kuştin û ji 7 hezarî zêdetir kes jî brîndar bûbûn. Herweha bi 10 hezaran kes jî koçber bûn.
Li Herêma Kurdistanê Covid-19
Heta roja 15ê Adarê li gor Wezareta Tenduristiya Herêma Kurdistanê, 34 kes li herêmê tûşî vîrusa Koronayê bûne, ku tûşbûna 6 kesan îro hat piştrastkirin. (AY/FD)
* Çavkanî: Ajansa Mezopotamya, Rûdaw
