Şaredariya Bajarê Mezin a Amedê dê di navbera 12 û 16ê Gulanê de Foruma Aştî û Azadiya Civakî li dar bixe. Forum wê 5 rojan bidome û gelek panel, hevpeyvîn, atolye û çalakiyên çandî-hunerî li xwe bigire.
Akademîsyen, siyasetmedar, hunermend, rojnameger, hiqûqnas, tevgerên jinan, rêxistinên ekolojiyê û gelek navên ji rêxistinên girseyî yên demokratîk wê beşdarî forûmê bibin. Her weha dê mijarên wekî aştiya civakî, çareseriya demokratîk, azadiya jinan, ekolojî, çand, ziman, bîr û demokrasiya herêmî werin nîqaşkirin.
Foruma ku wê bi mazûvaniya Şaredariya Bajarê Mezin a Amedê pêk were, wê li gelek xalên cuda yên bajêr were lidarxistin. Di çarçoveya forumê de nîşandana fîlman, pêşangeh, şano û konsert jî hene.
Vekirina Forumê
Vekirina forumê wê di 12ê Gulanê de li Salona Alî Emîrî ya Şaredariya Bajarê Mezin a Amedê pêk were. Di vekirinê de Hevşaredara Bajarê Mezin a Amedê Serra Bucak, Hevserokê Giştî yê DEM Partiyê Tuncer Bakirhan û Veysi Aktaş wê biaxivin.
Hûn dikarin bernameya Foruma Aştî û Azadiya Civakî li ser vê navnîşanê bişopînin.
(AY)
