.jpg)
Serokê berê yê Herêma Kurdistana Iraqê Mesût Barzanî, diyar kiriye ku her cure guhertina ku dê li welêt were kirin, divê di çarçoveya destûrê da be û herwiha divê mafê hemû pêkhateyan were parastin.
Barzaniyê ku Serokê Giştî yê Partiya Demokrat a Kurdistanê ye jî di daxuyaniya xwe ya li ser Twitterê da wiha got, "Em geşedanan ji nêz va dişopînin.
Em piştgiriyê didin her cure gavî ku dê venegere dîktatoriyê û dê bibe piştevan ku krîz bi dawî bibe."
Barzanî wiha got, "Her cure guhertina ku dê li Iraqê were kirin, divê di çarçoveya destûrê da be û herwiha divê mafê hemû pêkhateyan were parastin."
Piştî ku Serokwezîrê Iraqê Adil Ebdulmehdî pêr ragihand ku ew ê îstifa bike, Barzanî daxuyaniyeke bi vî rengî da. Ji ber ku Kurdan di xwepêşandanên dijî hikûmetê da piştgirî dabûn Ebdulmehdî û destnîşan kiribûn ku pirsgirêk ne ji ber serokwezîrê ku ev salek e li ser peywirê ye, belê ji ber cîbicînekirina destûrê ye ku ev 15 sal e tê paşguhkirin.
Herêma Kurdistanê, serokwezîriya Ebdulmehdî wekî firsend bi kar anîbûn û ji bo çareserkirina pirsa neft û budceyê ku di navbera Hewlêr û Bexdayê da ji 2014an vir va dewam dike, gav avêtibûn.
Hewlêr û Bexdayê hefteya borî ragihandibûn ku ji bo çareserkirina pirsgirêkê wan li hev kir û ew ê peymana dawîn jî vê hefteyê îmze bikin.
Xwepêşandanên li Iraqê
Li Iraqê li çendîn herêman ji bo protestokirina bêkarî, gendelî û kêmasiya xizmetên qamûyê xwepêşandan tên lidarxistin û di van xwepêşandanên ku 1ê cotmehê dest pê kirin da heta niha ji 350î zêdetir kes hatin kuştin, ji 15 hezarî zêdetir kes jî birîndar bûn.
(MB)
*Çavkanî: Önder Beyter /AA
