Ji ber hîpertansiyon û xitimandina demarên dil tenduristiya Mahîr Polat di xetereyê de ye. Parêzerê Polat, Erkam Erdem têkildarî mijarê wiha got: "Tê gotin ku li nexweşxaneya di nava kampusa girtîgehê de heyetek kom bûye û dê nirxandinê bikin."
Di çarçoveya lêpirsîna “Lihevkirina Bajarî” a li dijî Şaredariya Bajarê Mezin a Stenbolê de di 23ê Adarê de Cîgirê Sekreterê Giştî yê Şaredariya Stenbolê Mahîr Polat hat girtin. Pirsgirêkên tenduristiyê yê Polat didomin.
Parlamenterên Partiya Gel a Komarî (CHP) û parêzerên Polat ji ber pirsgirêkên tenduristiyê daxwaza berdana wî dikin.
Yek ji parêzerên Polat, Erkam Erdem îro li ser hesabê xwe yê medyaya civakî (X) ragihand ku Polat dîsa birine nexweşxaneyê û weha gotiğe:
“ Mahîr Beg birine nexweşxaneyê. Heta niha me piştrast nekiriye ka kîjan nexweşxane ye. Li gorî agahiyên ewil ên ku me bi dest xistine, Mahîr Beg ne ji ber rewşeke lezgîn, ji ber girtina raporê birine nexweşxaneyê. Tê gotin ku li nexweşxaneya ku li kampusa girtîgehê ye,heyetek kom bûye û dê nirxandinê bikin."
Alîkarê Sekreterê Giştî yê ÎBByê di dema girtina xwe de rewşa wî xerab bûbû û 2 caran rakiribûn nexweşxaneyê.
Ocalan: “Sosyalîzm, civak e. Civaktî ye. Sosyalîstî jî civakbûyîn e. Pêwîste bi vê têgihiştinê siyaset bê kirin.”
Rêberê PKKê Abdullah Ocalan ji ciwanan re peyamek şand û got, “Sosyalîzm, civak e. Civaktî ye. Sosyalîstî jî civakbûyîn e. Li Kurdîstanê jî pêwîste bi vê têgihiştinê siyaset bê kirin.”
Meşa Ciwanên Partiya Wekhevî û Demokrasiyê ya Gelan (DEM Partî) a ji bo 76emîn rojbûna Rêberê PKKê Abdullah Ocalan di roja 3emîn de ye. Ciwanên ku di 1ê Nîsanê de ji Amedê ber bi Amarayê ve meşiyan, tevlî Festîvala 4ê Nîsanê ya li taxa Xelfetî hat lidarxistin bûn.
Li gorî nûçeya Ajansa Mezopotamyayê di festîvalê de peyama Rêberê PKKê Abdullah Ocalan ya ji bo ciwanan hate xwendin.
Peyama Ocalan wiha ye:
“Meha Nîsanê ji bo min Ronesansek e. Zayînek ji nû ve ye. Meşa ciwanan, meşa ber bi azadiyê ve ye. Meşandina ber bi azadiyê ve, bi wate ye. Ez diçûm ku min xwe bi rêxistin dikir. Gava ez diçûm dibistanê komek min a ku bi min re tevdigeriya hebû. Civakbûyîn bi vî awayî çêdibe. Ji zaroktiya xwe heya niha ez vî tiştî dikim.
Sosyalîzm, civak e. Civaktî ye. Sosyalîstî jî civakbûyîn e. Li Kurdîstanê jî pêwîste bi vê têgihiştinê siyaset bê kirin. Navê wê siyaseta civakî û sosyalîst e. Ev jî bi rêxistinkirinê dibe. Rêxistinî, karê herî girîng e. Heger hûn nekin, ez ê bi tunî rexne bikim. Ji bo wê (jî) li her derê pêwiste hûn xwe rêxistin bikin. Her derê (jî) rêxistin bikin. Piştgiriya xebatên we dikim, silavên xwe ji we re dişînim.”
