23emîn Festîvala Çandê ya Munzûrê, li Qada Seyîd Riza a Dersimê dest pê kir. Li gel partiyên siyasî û rêxistinên civakî gelek kes beşdarî festîvalê bûn.
Festîvala îsal bi dirûşma ‘’Dersim jiyan e; dest bi xweza, îrade, ziman û baweriya min nede’’ hat lidarxistin.
Di festîvalê de Serokê Federasyona Komeleyên Dersimê (DEDEF) Alî Riza Bîlîr, ji malbatên kesên ku di şewata li Eskîşehîrê de jiyana xwe ji dest dane re sersaxî xwest.
Hevşaredara Dersimê Bîrsen Orhan ku li cihê wê qeyûm hat tayînkirin, anî ziman ku Festîvala Dersimê çand, bawerî, ziman û seknek e û diyar kir ku di heman demê de li hemberî kiryarên antîdemokratîk mihrîcaneke berxwedanê ye.
Bernameya Festîvala Mûnzûrê aşkera bû
“Em ê têkoşîna xwe bidomîne”
Bîrsen Orhan bi bîr xist ku mihrîcan ji aliyê Dersimîyan ve li hemberî qedexeyên di salên 1990’î de hatiye destpêkirin û got:
‘’Eşkere ye ku wê Dersim di civaka demokratîk de rol bilîze, bi fedekarî xwedî li pêvajoyê derketiye. Ji bo demokratîkbûyîna civakê û parastina mafê hemwelatîbûna wekhev em ê têkoşîna xwe bidomînin.’’
“Ji bo zimanê xwe xwedî li festîvalê derkevin”
Bîrsen Orhanê destnîşan kir ku zimanê dayikê jî di bin qirkirinê de ye, bal kişand ser polîtîkayên desteserkirina şaredariyan û got:
‘’Dema qeyûm hat, destpêkê saziya zimanî girt. Hem li Şaredariya Dersimê hem jî hem li Şaredariya Pulurê îradeya gel hate desteserkirin. Girêdayî vê yekê em bang li hemû kesan dikin ku xwedî li mihrîcanê derkevin.’’
Hatibû plankirin ku destpêka mihrîcanê bi şahiya dahol û zirneyê bê kirin lê belê ji ber kesên ku di şewata li Eskîşehîrê de jiyana xwe ji dest dane, hate betalkirin.
(AY)
