Evrîm Kepenek, edîtora nûçeyên jinan a bianetê, li ser îdiaya "zarokek du salî ji ber îstismara zayendî li Beylikduzuya Stenbolê miriye" nûçeyek weşandibû. Kepenek îro bi tohmeta ku "nepeniya lêpirsînê binpê kiriye(TCK 285)" derket pêşberî dadwer.
Ji bo Kepenekê ji salek heta sê salan cezayê girtîgehê tê xwestin. Kepenek bi parêzera xwe Deniz Yazgan-Şenayê re beşdarî danişîna li 9emîn Dadgeha Cezê û Esliyê a Buyukçekmeceyê bû. Polîs di tevahiya danişînê de li salona dadgehê û li ber derî li sekinandî bûn.
Kepenekê li dijî nêrîna dozger parastina xwe kir û diyar kir ku ew 20 sal in rojnamegeriyê dike. Kepenekê gotiye ku dema wê ew nûçeya çêkiriye ti biryareke nepenîtiyê li ser dosyayê tune bû.
Kepenekê destnîşan kir ku piştî weşandina nûçeyê biryara nepenîtiyê li ser dosyayê hatiye danîn û her weha diyar kir ku mebesta wê kirina sûc tune bû:
"Di tevahiya jiyana xwe ya pîşeyî de, ez pabendî prensîbên pîşeya çapemeniyê bûm. Min bi taybetî ji bo ku dengê jin û zarokan bidim bihîstin xebitîm. Agahdarkirina civakê bi awayekî rast û exlaqî bêyî ku mexdûran ji nû ve mexdûr bikim bingeha têgihîştina min a rojnamegeriyê ye."
Ez di nûçeya navborî de jî li gorî heman prensîban tevgeriyam. Min navê zarok an jî navê malbata wê bi kar neanî. Bi rêzgirtina ji bo karîneya bêgunehiyê, min tenê li ser agahî û encamên piştrastkirî nûçeyek çêkir.
Piştî ku bijîşkê li Nexweşxaneya Dewletê ya Beylikduzuyê dixebitî bi min re têkilî danî û çavdêriyên xwe parve kir, li ser daneyên di raporê de ez bi pisporên tiba edlî re şêwirîm. Min nûçeyên xwe li gorî nerînên pisporan, bi berçavgirtina berjewendiyên zarok û bêyî bikaranîna navan amade kir.
Nûçeya min ne ew nûçeya bû ku zirarê bide lêpirsînê. Biryara Piştî nepenîtiyê piştî nûçe hat weşandin hatibû dayîn. Ji wê rojê ve min di derbarê mijarê de tu nûçe çênekiriye.
Kepenekê daxwaza beraeta xwe kir û parastina xwe bi dawî kir. Piştre parêzera wê Denîz Yazgan-Şenayê mafê axaftinê girt. Yazgan-Şenay diyar kir ku doz bi şaşî li Kepenekê hatiye vekirin û Kepenek ne yekem kes bû ku ew nûçeya çêkiriye û got, "Muwekîla min di nûçeya xwe de nav bi kar neaniye. Muwekîla min di nûçeyên derbarê kalikê zarokê de jî ne nav bi kar aniye û ne jî hedef nîşan daye. Ti hêmanek niyetê tune. Em daxwaza beraeta wê dikin."
Piştî axaftina Yazgan-Şenayê, dadgehê bê navber biryara xwe eşkere kir. 10 meh cezayê girtîgehê li Kepenekê birî. Dadgehê eşkerekirina biryarê taloq kir. Ceza ji bo 5 salan hat taloqkirin.
(HA/AY)
