Ûkrayna: Em ê ti tiştekî nedin ti kesî

Fotograf: AA

Ji bo nûçeya tirkî (1) (2) (3) bitikîne

Piştî ku Rûsyayê biryar da û serxwebûna Donetsk û Lûganskê nas kir, Serokdewletê Ûkraynayê Vladîmîr Zelenskiyî li ser hesabê xwe yê medyaya civakî bang li gel kiriyiye. 

Zelenskiyî diyar kiriye ku Rûsyayê bi gavên dawiyê serwerî û hevgirtina xaka Ûkraynayê binpê kiriye û “Hemû berpirsiyariya encamên biryara hatiye dayîn, li ser milê Rûsyayê ye.”

Zelenskiyî gotiye ev biryar tê wê wateyê ku Rûsya yekalî ji peymana Mînskê derketiye û biryarên Formata Normandiyayê paşguh kirine û hewldanên aştiyê têk biriye. 

Serokdewletê Ûkraynayê bang li dewletên peywendîdar kiriye ku Civîna Bilind a Çarkolî ya Normandiyayê kom bikin. 

Pûtînî duh biryar aşkere kiribû

Serokdewletê Rûsyayê Vladîmîr Pûtîn duh bi şev, di televizyonên Rûsyayê de axivîbû û Komara Gel a Donetskê û Komara Gel a Luhanskê weke du welatên serbixwe nas kiribû. 

Pûtînî plana bipêşxistina çekên nûkleerî yên Ûkraynayê weke “gef” binav kiribû û gotibû “Em ê bersiva van gefan bidin.”

Serokdewletê Rûsyayê li Kremlinê, li ber kamerayan bi serokên her du komaran re peymanên naskirin û hevkariyê îmze kiribû. 

Pûtînî piştî wê bi çend saetan ferman daye Artêşa Rûsyayê ku her du herêmên serxwebûna xwe ragihandine biparêzin. Pûtînî ev ferman bi gotina “parastina aştiyê” daye. 

Tirkiye: Em biryarê qebûl nakin

Wezareta Karûbarên Derve daxuyaniyeke nivîskî weşandiye û ji bo biryara Rûsyayê gotiye, “Biryara naskirina qaşo Komarên Donetsk û Luhanskê qebûl nakin.” 

Serokên DYA, Fransa û Almanyayê roja duşemê bi rêya telefonê axivîne û gotine ku, li dijî Rûsyayê “ew ê bi berdewamî gavên paşê e bi hev re koordîne bikin.”

Koşka Spî jî daxuyaniyek weşandiye û serokan biryara Pûtînî ya derbarê her du komaran de “şermezar kiriye” 

Berdevkê Antonio Guterres, Sekreterê Giştî yê NYyê jî ji bo biryara navborî diyar kiriye ku Rûsyayê hevgirtina xakê û serweriya Ûkraynayê binpê kiriye. (AEK/HA/FD)