Tifaqa Ked û Azadiyê: Ne OHAL, divê seferberiya civakî bihata ragihandin

Ji bo nûçeya tirkî bitikîne

 Serokomar û Serokê Giştî yê AKPê Recep Tayyîp Erdogan bi daxuyaniyekê ragihandibû ku ji bo 3 mehan li Mereş, Dîlok, Meletî, Semsûr, Riha, Amed, Kîlîs, Osmaniye, Edene û Hatayê Rewşa Awarte (OHAL) hatiye îlankirin. Tifaqa Ked û Demokrasiyê têkildarî erdhej û OHALê daxuyaniyeke nivîskî daye.

“Desthilat dixwaze xwe biparêze”

Di daxuyaniyê de hatiye gotin ku bi ser erdhejê re 55 saet derbas bûne lê hê jî bi hezaran kes di bin xerabeyan de ne û weha gotiye: “Mexdûrên erdhejê yên karîn xwe xelas bikin jî di nava mercên giran de tî û birçî ne. Desthilata AKP-MHPê ev 3 roj in gel terkî mirinê kiriye. Desthilata AKP-MHPê di nava 24 saetan de gavek jî neavêt bajarên erdhej lê çêbûye. Li cihê ku mudaxele û alîkariyan organîze bikin, bi ragihandina OHALê re hewl dide ne gel, xwe biparêze. Gelên Tirkiyeyê baş dizanin ku ev desthilat ji bo karesatên bi vî rengî dibêje; ‘lutfa xwedê’ û hewl dide bo xwe bike firsend. Desthilat bi OHALê re dixwaze van bajaran bigire, torên piştevaniyê qut bike, ketina rojnamegeran a li van herêman qedexe bike da ku agahiyên rast neyên parvekirin, alîgirên xwe yên sûcdar veşêre û îktîdara xwe biparêze. Ya ku divê bihata kirin ne OHAL,  seferberî ye.

“Em ê bi hev re ji binê vê karesatê derkevin”

“Em ê zextên bi OHALê re derdikevin holê nas nekin. Banga me ji bo dewletê ew e ku hemû derfetên xwe pêşkeş bike û ji bo parastina civak û jiyanê seferber bibe. Divê çavkaniyên gel ne ji bo bekaya îktîdarê lê ji bo gel bên bikaranîn. Hemû astengkirinên îktîdarê, sûcekî li dijî gel û jiyanê ye. Em ê piştevaniya heyî mezintir bikin, jiyanê biparêzin û li qadan li cem gelê xwe bin. Em ê vê hilweşînê bi hev re rakin.”(EMK/AY)