Mûsewiyên Tirkiyeyê Cejna Hanûkayê pîroz kirin

Ji bo nûçeya Tirkî / Ingilizi bitikine

Muzexaneya Mûsewiyên Tirkan a Weqfa Sala 500. û Sînagoga Neve Şalomê mazûbaniya Cejna Hanûkayê (Cejna Ronahiyê) kirin. Duh 8emîn mûma Hanûkayê ji bo “Aştiyê” hat pêxistin.

Bername li Sînagoga Neve Şalomê çêbû ku îbadetxaneya herî mezin a li Stenbolê ya civaka Mûsewiyan Tirkiyeyê ye. Li vir Haham Rav Îsak Halevayî behsa dîrok û armanca cejnê kir.

Cejna Hanûkayê di 25emîn roja meha Kislevê de tê pîrozkirin û 8 rojan berdewam dike. Pîrozbahî îsal di 12yê Kanûna Pêşiyê de dest pê kirin. Ji bo bîranîna serhildana Cihûyan a li hemberî Selefkiyan, her roj find tên pêxistin û her rojê findek li hejmara findan tê zêdekirin. Ji ber vê taybetmendiyê navê cejnê weke “Hag Ameorot/Cejna Ronahiyê” jî tê zanîn.

Êrîş jî hatin bîranîn

Halevayî di axavtina xwe de êrîşên di salên 1986, 1992 û 2003yê li ser Sînagoga Neve Şalomê jî bibîr anî. Haham Halevayî got, “Neve Şalom û sînagogên me yên din piştî êrîşên bi vî awayî her carê karibû li ser lingan bimîne”.

Piştî axavtina Halevayî Avî Cavît Habîb Serokê Weqfa Sala 500. û Haham Halevayî finda heştem pêxistin. Mûsewiyên li sînagogê jî tevlî Halevayî dia kirin. Nîsya Îşman Allovî Midûrê Muzexaneyê got, “Di nuwazeyên ronahiyê de îsal em findên xwe ji bo ‘Aştiyê’ pêdixin.”

Kesên ku serdana muzexaneyê dikirin û ne Mûsewî bûn jî beşdarî li pîrozbahiyê kirin. Di roja dawiyê ya cejnê de şêraniya bi navê Sagûnyatê dan beşdaran ku Cihûyên Polonyayê çêdikin û weke kevneşopiyeke Hanûkayê ye. (PT/FD)