Li Sêrtê hemû çalakî ji bo 15 rojan hatine qedexekirin

Walîtiya Sêrtê bi daxuyaniyekê aşkere kiriye ku li seranserê bajêr meşên xwenîşandanê, civînên çapemeniyê, çalakiyên rûniştinê û yên weke wan, heta 15 rojan qedexe kirine.

Biryara qedexeya çalakiyan îro (13ê Tîrmaha 2023an) destpê kiriye û wê heta saet 23.59ê 27 Tîrmehê dewam bike. Bernameyên ku walîtî û qaymeqamiyan erê kirine wê ne qedexe bin. 

Walîtiyê li ser malpera xwe ya fermî ev biryar weşandiye û bi van gotinan sedema qedexeyê ragihandiye: “Ji bo ewlehiya netewî, rêk û pakiya  civakê, pêşî li sûcan bigirin, maf û azadiyên kesên din biparêzin, tenduristiya giştî biparêzin û nehêlin provokasyonên ihtimal û bûyerên civakî pêk werin."

Ji bilî van, her cure civîn, meşên xwenîşandanê, miting, civînên li qadên vekirî, çalakiyên protestoyî, çalakiyên rûniştinê, grevên birçîbûnê, vekirina standan, kampanyayên îmzeyan, konser, şahî, belavkirina belavokan, belavkirina broşuran, vekirina afîş û posteran û yên din hatine qedexekirin.(AY)