Dayikên/Mirovên Şemiyê 25 sal in çalakiyan li dar dixin: Em ê dest jê bernedin

Ji bo nûçeya tirkî / ingilîzî bitikîne

Dayikên/Mirovên Şemiyê ji 27ê Gulana 1995an û vir ve li aqûbeta xizmên xwe yên winda dipirsin. Yanî 25 sal bûye ku Dayikê/Mirovên Şemiyê çalakiyan li dar dixin û di 25 saliya çalakiyên xwe de careke din çûne Qada Galatasarayê.

Dayikên/Mirovên Şemiyê qurnefîlên sor danîne qadê û wiha gotine: “25 sal beriya niha, 27ê Gulana 1995an bi gotina ‘Em Windahiyên Xwe Dixwazin’ em hatin Galatasarayê. Me careke din bi qurnefîlên xwe got, em dest ji windahiyên xwe û ji Galatasarayê bernadin ku em û windahiyên xwe liv ir tên ba hev.”

Li vir Masîde Ocak, xwişka Hasan Ocak ê ku di 21ê Adara 1995'an de hatibû revandin û kuştin, got, 25 sal berê di 1995an de cara yekem em derketin Qada Galatasarayê: “Me li qadan dayikên xwe û xwişk û birayên xwe winda kirin. Lê em ê ti carî dest ji lêgerîna windayên xwe bernedin."

Hasan Karakoç, birayê Ridvan Karakoçî jî diyar kiriye ku wan ciwaniya xwe da vê qada Galatasarayê û dê dest ji vê qadê bernedin. Karakoçî aniye ziman ku 25 salin li vir in û hezar sal derbas bibe jî dê dîsa li vir bin.

Îkbal Eren, Birayê Hayrettin Erenî jî aniye ziman ku dayikan li vir li aqûbeta zarokên xwe pirsîn û li zarokên xwe geriyan û wiha gotiye: "Dayik li vir li cesedên zarokên xwe geriyan. Dayika min deynê xwe ji dewletê negirt û çû. Divê deynê dayikên me bidin wan. Binçavkirin û windakirin sûcê mirovahiyê ye. Teqez em ê hesabê vê yekê bipirsin. Heta ku faîl bên dîtin û darizandin em ê hesap ji we bipirsin."

Dayikan piştî daxuyanî dan li Kolana Îstiklalê meşiyan û derbasî Komeleya Mafên Mirovan a Stenbolê bûn e.

Dayikên/Mirovên Şemiyê ji bo 25em salvegera çalakiya xwe li ser medyaya civakî jî kampanyayek dane dest pê kirin. Dayik/Mirov bi hashtaga #KayıplarımızıAramaktanVazgeçmeyeceğiz (Em ê dest ji lêgerîna windahiyên xwe bernedin) mesajan diweşînin. (FD)

*Çavkanî: MA