“Divê Tirkiye heta sala 2022yan hemû mayînan tune bike”

Ji bo nûçeya tirkî bitikîne

Tevna Xebatên Li Ser Zarokan a Amedê, piştî bûyera teqîna mayînan li Pulurê û mirina du zarokan daxuyaniyek belav kiriye. Nêzîkî 20 saziyên civakî hatine ba hev û ev tevn ava kirine.

Tevnê di daxuyaniya xwe de diyar diriye ku, bikaranîna mayînên bejayî ji hêla peymanên netewî û navnetewî ve hatiye qedexekirin û Peymana Ottowayê bi bîr xistiye:

“Peyman di sala 2004ê de li Tirkiyeyê ketiye meriyetê. Li gorî peymanê, diviya Tirkiye heta sala 2014ê mayinên bejayî tune bikira, qadên bi mayin paqij bikira, ji bo sivîlan ji mayînan û bermahiyên wan biparêze, xebatên haydariyê bikira”.

“Lê Tirkiyeyê ji bo van berpisiyariyan pêk bîne, xwestiye dem bê dirêjkirin û li xwe girtiye ku heta sala 2022yan hemû mayinên li ser sînoran û nêzîkî sînoran paqij bike. Her weha berpirsiyariya dewletê, ji bo her du prensîbên bingehîn ên Peymana Mafên Zarokan a Neteweyê Yekgirtî heye ku ew jî derbarê mafê jiyîna zarokan û berjewendiyên bilind ên zarokan de ye”.

Tevnê diyar kiriye ku li 64 welatan zêdetirî 100 milyon mayinên bejayî hene û ev agahî dane:

“Li Tirkiyeyê jî tê gotin ku hejmara mayinên bejayî nêzîkî milyonekî ye. Her weha li Tirkiyeyê di depoyan de nêzîkî 3 milyon mayin hene ku divê bên tunekirin.”

Li navçeya Pulurê du zarokên şivan dema heywanên xwe biribûn çêre, teqemenîyek li wan teqîyaye.

Herdu zarok li cihê bûyerê birîndar bûne. Ayaz Gulogluyê 8 salî li cihê bûyerê miriye.

Nupelda Gulogluya çar salî ji bo nexweşxaneyê hatiye birin. Keça çar salî li nexweşxaneyê miriye.

Hêzên ewlehîyê li cihê bûyer qewimî lêkolîn kirine lê hêj diyar nebûye ka çi teqîyaye.

Şaredar: Teqemenîyeka xwemalî...

Şaredarê Pulurê Mustafa Sarıgülî ji bianetê re gotiye hin malbat çûne zozanan. Zarokên teqemenî li wan teqîyane zarokên wan malbatan in. 

"Zarok ji malbata xwe dûr ketine. Cihê ku ew çûnê wan teqemenî dîtine. Em texmîn dikin ku teqemenîyên xwemalî ne. 

"Em sersaxîyê ji malbatê re dixwazin." (AO/FD)