Ji bo nûçeya Tirkî / İngilîzî bitikîne
Komîteya Parastina Rojnamegeran a Navnetewî (CPJ) aşkere kir ku li gorî daneyan heta meha Kanûna Pêşiyê ya 2017yê, li cîhanê 262 rojnameger di girtîgehê de bûn. Komîte her sal rapora xwe aşkere dike û li gorî rapora îsal Tirkiye, Çîn û Misir di her sê rêzên sereke de ne ku herî zêde rojnameger li van welatan di girtîgehê de ne.
Rapor diyar dike ku hejmara rojnamegerên girtî li Tirkiyeyê li gorî sala derbasbûyî 8 kes kêmtir bûye û daketiye 73yê. Li gorî Rapora Çavdêriyê ya Medyayê ya ku bianet amade dike, heta meha Çiriya Pêşiyê de 122 rojnameger di girtîgehê de bûn.
“Piştî hewldana derbeyê fişar zêdetir bûye”
Rapor ji hêla Elena Beiser ve hatiye amadekirin û di raporê de hatiye diyarkirin ku Tirkiye du sal in ku dibe “welatê herî zêde rojnameger lê girtî ne”. Di berdewamiyê de wiha hatiye gotin:
“Di sala 2016yê de ku fişara li ser çapemeniya Tirkan dest pê kiriye, piştî hewldana derbeyê ya meha Tîrmehê zêdetir bûye. Rayedaran hin rojnameger tenê ji ber programa mesajan a bi navê ByLockê bi kar anîne yan jî tenê ji ber di wan bankayan de hesabên wan hebûye ku tê îdiakirin di nava saziyên Gulenîstan de ne.”
“Serokên din ji Trumpî hêzê distînin”
CPJyê aşkere kiriye ku li cîhanê ji sedî 74 rojnamegerên ku girtî ne “ji ber sûcên li hemberî dewletê” gelek ji wan jî “yasayên terorê yên berfireh û nediyar” di girtîgehan de ne.
Komîteyê diyar kiriye ku bi yaseyên weke van, dixwazin rojnamegeriya rexneyî tê çewisandin.
Di raporê de helwesta Donald Trump Serokê DYAyê ya li hemberî medyaya rexneyî hatiye nirxandin. Komîteyê destnîşan kiriye ku ev helwesta Trump a ku medyaya rexneyî bi zimanekî netewperest û bi gotinên “nûçeyên derew” binav dike, dihêle serokên welatên ku rojnamegerên girtî lê hene heman helwestê berdewam bikin.
Li Çînê hejmar zêde bû, li Misrê ket
Li gorî rapora CPJyê li cîhanê 21 rojnameger bi sûcê “nûçeyên çewt” hatine sûcdarkirin û hatine girtin ku ev hejmar di asta herî bilind de ye.
Rapor diyar dike ku hejmara rojnamegerên girtî li Çînê ji 38an derketiye 41yê.
Li Misrê 21 rojnameger girtî ne ku sala borî ev hejmar 25 bû. (PT/FD)
*Ji bo hemû raporê bitikîne
