17 HDPyiyên desteserkirî hatine girtin, 3 ji wan serbest bûne
Fotograf: Medyaya civakî
Ji bo nûçeya tirkî / ingilîzî bitikîne
Dadweriya Silh û Cezayê ya nobedar li Enqereyê biryara girtina 17 HDPiyan daye. Parlamenterên berê, Hevşaredarê Qersê Ayhan Bîlgen û endamên berê û yên nû yên Lijneya Rêveber a Navendî ya Partiya Demokratîk a Gelan (HDP) jî di nav de 20 kes di encama lêpirsîna Serdozgeriya Komarî ya Enqereyê de hatibûn desteserkirin.
Kesên desteserkirî heta destê sibehê li edliyeyê îfade dane. Dozgerî daxwaza girtina her 20 HDPyiyan kiribû û ew şandibûn dadgehê.
Dadweriya Silh û Cezayê ya nobedar vê sibehê biryar daye ku Altan Tan, Sirri Sureyya Onder û Gulfer Akkaya bi şertê kontrola edlî serbest bibe. Her weha biryara girtina Ayhan Bilgen, Ayla Akat Ata, Alp Altinors, Nazmi Gur, Emine Ayna, Bircan Yorulmaz, Berfin Ozgu Kose, Dilek Yagli, Can Memiş, Gunay Kubilay, Bulent Barmaksiz, Zeki Çelik, Pervin Oduncu, İsmail Şengun, Ali Urkut, Cihan Erdal, Emine Beyza Ustunê daye.
Çi bûbû?
Serdozgeriya Komarî ya Enqereyê di 25ê Îlonê de li 7 bajaran ji bo 24 endamên Lijneya Birêvebirinê a Navendî(LBN) ya Partiya Demokratîk a Gelan (HDP) biryara desteserkirinê dabû. Siyasetmedarên HDPyî ji ber lêpirsîna derbarê çalakiyên Kobanê de hatibûn desteserkirin ku ev çalakî di 6-12ê Çiriya Pêşiya 2014an de pêk hatibûn.
Piştî biryara dozgeriyê Hevşaredarê Qersê Ayhan Bîlgen, endamê Lijneya Bilind a Radyo û Televizyonê (RTUK) yê HDPyê Alî Urkut, Endamê Komisyona Karûbarên Derve yê HDPyê Nazmî Gur, Endamên berê yên LNByê yên HDPyê Can Memîş, Gulfer Akkaya, Berfîn Kose, Bîrcan Yorûlmaz, Endamê LNByê yê HDPyê Alp Altinors, parlamenterên berê yên HDPyê Sirri Sureyya Onder, Ayla Akat Ata, Emine Ayna, Beyza Ustun û Altan Tan, endama Meclîsa jinan a HDK-HDPyê Dilek Yagli, endamê berê yê Pardiya Meclîsa HDPyê Pervîn Oduncu û berdevkê berê yê HDPyê Gunay Kubilay hatibûn desteserkirin.
Kesên ku hatibûn desteserkirin heman rojê li bajarên ku lê dijîn anîbûn Rêvebiriya Emnîyetê ya Enqereyê. HDPyîyên ku 24 saetan qedexeya hevdîtinê li ser bûn ji duh pê ve bi parêzerên xwe re dest bi hevdîtinan kirine.
Her weha navê Arife Kose, Yurdusev Ozsekmenler, Bayram Yilmaz û Zeynep Karaman jî di wê lîsteya ku ji 24 kesan pêk hatiye de bûne. Lê ji ber ku li mal nebûne desteser nekirine.(RT/FD)