Li Îzmîrê çalakiya “Li Hemberî Hemû Derbekirinan Berxwedana Demokratîk”

Ji bo nûçeya Tirkî bitikîne

Hêzên Ked û Demokrasiyê yên Îzmîrê duh li Qada Cumhuriyetê li dijî zextên ser çapemeniyê, girtina siyasetmedarên bijartî, tayînkirina qayûman û jikaravêtinan çalakî lidar xist.

Di çalakiyê de dovîzên weke “Bêdeng nemîne, wê dor were te jî”, Zextên li ser çapemeniyê bila bi dawî bibin”, “Li dijî hemû derbekirinan berxwedana demokratîk”, “Çapemeniya Azad bêdeng namîne” û “Hûn nikarin dest daynin ser îradeya gel” daliqandin. Kesên ku tevli çalakiyê bûn rojnameyên Azadiya Welat, Evrensel û Cumhuriyetê jî destê xwe de gerandin.

Yalçin: Armanca wan ew e ku “partî-dewlet” ava bikin

Sekreterê Lijneya Kordînasyona Bajêr ya TMMOBê Melih Yalçin li ser navê Hêzên Ked û Demokrasiyê daxuyaniya çapemeniyê xwend:

“Hukimetê bi KHKan bi hezaran karmend û kedkarên KESKî ji kar avêtine ku ti têkiliyan bi cemaetê re nîn e. Bi vî awayî careke din mebesta xwe bi vî rengî eşkere kirine.

“Armanca hukimetê ew e ku hemû welatiyên ku AKPî nîn in ji wezîfeyên dewletê dûr bixin û bi vî awayî sîstema “partî-dewletê” ava bikin. Hevşaredarên Bajarê Mezin a Amedê Gultan Kişanak û Firat Anli jî hatin girtin. Îktîdar hewl dide ku şaredariya ku di hilbijartinê de nekaribûye hilde, bi awayî bi dest bixe.”

“Em ê mil bi mil ligel hev bin”

“Em weke hêzên ked û demokrasiyê careke din li vir jî tînin ziman ku, em li hemberî OHAL, zext û zordariyan, sîstema seroktiyê serî natewînin. Em ê di nav hevgiriyeke mezin de mil bi mil ligel hev bin.”

(GI/HK/YO)