Ji bo nûçeya Tirkî bitikîne
Parlamentera Amedê ya Partiya Demokratîk a Gelan (HDP) Sibel Yigitalp aşkere kir ku Kemal Kurkut ê ku li Amedê di dema pîrozbahiyên Newrozê de bi guleya polîsan hat kuştin ‘înfazeke aşkere ye’.
Kurkut ji bo ku beşdarî pîrozbahiya Newrozê bibe çibû Amedê û di xala kontrole ya polîsan a li ser Kolana Evrim Alataş a nêzîkî Parka Newrozê de bi guleya polîsan ve hat kuştin.
BIXWÎNE - IHD: EM Ê LÊKOLÎNÊ LI SER BÛYERA KUŞTINA WÎ CIWANÎ BIKIN KU LI MEYDANA NEWROZÊ HAT KUŞTIN
Di fotografên ku di dema bûyerê de hatine kişandin de di destê Kurkut de kêrek heye û jora laşê wî tazî xuya dike. Di heman fotografan de tê dîtin ku Kurkut bi polîsan re nîqaşê dike û xala polîsan derbas dike û direve. Hin polis guleyan bera wî, hin jî bera hewa didin. Dihaberê nivîsand ku digel fermandarekî polîsan gotiye “gule bera nedin” jî gule li Kurkut hatiye dayin.
Lê Walîtiya Amedê daxuyaniyek belav kir û got ku di deste Kurkut de kêr hebû, û ‘Guman hebû ku dibe xwekuj be” û herwiha derbarê bûyerê de lêkolîn hatiye destpêkirin.
Yîgitalp: Daxuyaniya Walîtiyê dûrî rastiyê ye
Sibel Yigitalp diyar kir ku daxuyaniya walîtiyê dûrî rastiyê ye.
Yigitalp pêşniyaznameya pirsê derbarê bûyerê de pêşkêşî Wezîrê Navxweyî yê Tirkiyê Suleyman Soylu kiriye. Yigitalp wiha got: “Gotinên rêveberên Komeleya Mafên Mirovan (İHD) ên şaxa Amedê û yên şahidan, herwiha dîmenên k udi çapemeniyê de hatine belavkirin dide xuyakirin ku ti şik tine ye ku ev bûyer înfazeke aşkere ye.”
Li gorî daxuyaniya İHD a Amedê ji bianetê re kiriye, ew ê bûyerê bişopînin lê ji hîna agahiyên zelal bidest nexistine û derbarê bûyerê de heta niha kesî serî li wan nedaye.
Kurkut ê ku ji bajarê Semsûrê ye, di Fakulteya Huneran a Zanîngeha İnonuyê de xwendekarê Beşa Muzîkê bû. Malbata wî li Malatyayê dijîn. Malbatê cenazeyê kurê xwe ji Saziya Tiba Edli ya Malatyayê wergit û merasîma cenazeye Kurkut duh li navçeya Batalgazî ya Malatyayê lidar ket.
Malbata Kurkut ji dihaberê re axivîn û diyarkiribûn ku kurê wan ji bo pîrozbahiyên Newrozê çibû Amedê. Xizmekî wî yê ji BBC beşa Tirkî re axivî gotiye ku Kurkut du roj berê, ji bo beşdarî Newrozê bibe, beyî agahdariyê bide malbata xwe saet 03.00 şevê ji Malatyayê bi rêya trênê çûye Amede. Xizmê wî yê ku nexwestiye navê xwe aşkere bike diyar kir ku daxuyaniyên dibêjin “Xwekuj e” ne rast in û got ku malbata wî gelekî xemgîn e û wan îdiayan qebûl nakin.
Herwiha hat îdiakirin ku Şaredariya Malatyayê ji bo cenazeyê Kurkut wesayita cenaze nedaye û ji bo ciyê gorê jî astengî derxistiye.
Derbarê bûyerê de Partiya Demokratîk a Gelan (HDP), Kongreya Demokratîk a Gelan (HDK), Kongreya Civaka Demokratîk (DTK), Partiya Herêmên Demokratîk (DBP) û Tevgera Jinên Azad (TJA) civîna çapemeniyê li dar xistin. Di civînê de berdekvê HDPê û parlamenterê Rihayê Osman Baydemir axivî û got, derketiye holê ku kuştina Kurkut înfazeke bêdaraz e.
(AS/FD)
