Ji bo nûçeya tirkî / ingilîzî bitikîne
Paleyên jin li gundê Heremreş ê Qosera Mêrdînê, di bin germahiya 40 pîleyî de 10 saetan kar dikin.
Jin ji bo biçin ser erdan, saet di 5ê sibehê de ji xew radibin. Saet di 7an de jî dest bi kar dikin. Di nava rojê de du caran ji bo 15 deqîqeyan betlaneya wan heye. Her weha ji bo xwarinê jî dikarin saetekê bêhna xwe vedin.
Karê paleyên jin êvarê saet di 5an de diqede.
Jin ji bo xwe ji germahiyê û tozê biparêzin cil û bergan li xwe dipêçin û ser rûyê xwe jî heta ber pozê xwe dinixumînin. Yek ji wan bi bîdon avê li wan belav dike û bi wan re di nava zeviyê de diçe û tê.
Jina bi navê Milkiyeyê got, ew serê sibehê radibin û diçin ser erd. Dest bi kar dikin. Milkiye diyar kir ku ew keda xwe nastînin û pereyê didine wan hindik e: “Em feqîr in. Em bi 100 lîreyan diçin bazarê, lê têra hewcedariyên zarokên me nake.” 7 zarokên Milkiyeyê hene. Wê got, divê heqdestê wan 60, 65 ango 70 lîre be.
Safya Demîrê jî got, ew 10-15 sal in ku vî karî dike. Ew di erdê pemboyî de kar dike. Piştî ev kar diqede ew diçe gelek karên din jî dike: “Ji ber feqîr in ez kar dikim. Ez di bin germê de dişuxilim. Zaroka min bi penceşêrê ye. Em nikarin debara xwe bikin. Yekê min li Egeyê, ya din jî li Wanê zanîngehê dixwîne. Zarokên min hûr in”.
Jinek di nava paleyan de ji Qamişloyê ye. Piştî şerê Sûriyeyê, hatiye Qoserê. Ew jî bi jinên din re kar dike.
Navê wê emîne ye. Wê got, sê sal berê hevjînê wê dest ji wê berda ye. Niha ew û 5 zarokên xwe ne. Neçar e li wan binêre. Emîneyê diyar kir ku li Qamişloyê jî heman kar dikir lê yewmiyeya wir ji ya vir zêdetir bû.
Çawîş an jî elçî paleyan dibînin û dibin ser erdan. Çawîş pereyên xwe ji xwediyê erdan, lê elçî ji karkeran distînin. Paleyên jin rojê bi 55 lîreyî kar dikin. 10 lîreyî didin elçiyan.
(FD)
*Fotograf: Ferid Demirel - bianet
.jpg)
