Sum Ustha

* Masalın Türkçesine buradan ulaşabilirsiniz.

Ar oputhes sum ustha korthu doren. Hantepek ukhuitkves-ki “Vidatçkvaar svaşa do hek vitsadat, çkuni oputhes otsadoni mutu var miğunan.” Hamoras arik tku-ki “Ar khoçi çkva minonan, çkun sumi-ti ustha voret, maotxani-ti gyari-tzkhari mxenu orthas.” Maotxani khoçi kozhires, mutepe khala keçhopes do gzas kogedgites doren.

İdes, ides, ides dulumces doren. Arik “Mteli aroğorda onciru var iven, tito-tito pçvat!” ya tku doren. Çopi istoles doren. İpti, ncaş usthas komoxvadu doren. Majurani terzis komoxvadu doren. Masumani khuumcis do maotxani zanaathi na-var uçkin khoçis.

Hantepe kodincires do ncaş usthak oçumu kogyoçhu doren. Çumthuşa “Çkimi nobethi oçodinapaşa ncaşi ar bozoş marita dopha” ya tku do dovu doren. Muşi nobethi na-mikhilu, terzi kogokhuéxinu do muk kodinciru doren.

Terzik bozoş marita na-zhiru “Haya ncaş usthaş noxone ren do hamuten ti imékvasen. Ma-ti ar khai dolokunu dovuçha hamus” ya tku doren. İri mutxani duçhu do kodolokunu doren. Muşi nobethi na-içodu, khuumci moselu do muk kodinciru doren.

Haya khuumcik na-zhiruu, hemuk-ti haşo zophu doren “Ma mutu var phi-na ncaş ustha do terzik çhumani hamute imtskvanen.” E-do, muk-tiokroşi dolokhidape duxenu doren. Hemuş nobethi na-mikhilu, mutu na-var uçkin khoçi keoselu doren.

Haya khoçik hantepe na-zhiru gemzuli kodoskidu doren. Hemu şeni-ki, mus mutu na-var uçkithu kuçkithu do “Çhumani usthape gemamtskvasen” ya do ğormotis oxvetzu doren: “Çhumani hentepeş üala oncğores mot gemithalam, hamus şuri komeçi!” ya. Mtini-ti bozok şuri komoğu doren.

Çhumani mteli gokhutsxes doren. 25Eiseles do şurite bozo na-zhires, okhokhidinus kogyoçhkhes doren. Ncaş usthak “Tkvan mutu var giçkithes do ma gevoçhkhi haya, bozo çkimi ren” ya tku doren. Terzik, “Tsori ren, si gyoçhkhi, mara si thetheli naşkvi, oncğore muçho var gavu!” ya utzu doren. “Dolokunu ma dolovokuni, e-do çkimi ren” ya. Khuumcik “Çkimi ren, hemu şeni-ki, okro ma vuxveni do nişani ma mepçi. 30Hemuşeni çkimi ren” ya tku doren. Zanaathi na-var uçkin khoçik “Tkvan xvala marita vit, şuri ma gevudgini do çkimi ren” ya.

Haşo okhobunanşa, néxenis gexuneri ar mapaş bere komoxtu doren. “Muş dava giğunan, mot okhobut?” ya do khitxu doren. Hantepek-ti mteli mutxani dupharamites doren. Mapaş beres-ti na-zhiru mskva bozos toli konoskidu do muk-ti okhokhidus kamaxtu doren. Okhule “Çkuni dulya xvala sudis naçhkhviden do sudişa vidat” ya tkves-doren. Okhibğes do sudişa mendaxtes doren. Sudiş reizis-ti toli konoskidu do he-ti okhokhidus kamaxtu doren.

Hantepe haşo okhobunanşa, bozo tamo tamo idu do ncas konodgitu doren. Nca okhuitzkhu, bozo kamaxtu doren do nca kokhitu doren. Hantepek mendatzkhedes-şi bozo var ren!

Lazepeşi mcveşi notkvame ren: nca ekhvatumthaşa, ncaşen na-gamulun tzkhari hem bozoşi çelamure ren.

* Okhorobu: Guram Kharthozia

* Na ğaru: Zelkif Çavuş Kabdemir

* Turkuris golaktalu: İsmail Bucaklişi

* Masalın Türkçesine buradan ulaşabilirsiniz.